Ndodheni
Indeksonline / Ekonomi
09:18 / E mërkurë, 26 Shtator 2012
0 Komente
FMN-ja nuk do të pranojë rritje të sërishme pagash në Kosovë

Qeveria e Kosovës mund të përjashtohet sërish nga marrëveshja “Stand-By” e lidhur sivjet me Fondin Monetar Ndërkombëtar, nëse realizohet premtimi i radhës i kryeministrit Hashim Thaçi për rritjen e pagave për mësimdhënësit.

Gjatë një vizite në Skenderaj, kreu i Qeverisë u ka premtuar punëtorëve të arsimit rritje të pagave prej 50 për qind gjatë vitit 2013. Kjo rritje e shpenzimeve për pagat e mësimdhënësve është në kundërshtim të plotë me marrëveshjen “Stand-By”, por edhe me vetë premtimin e firmosur nga kryeministri Thaçi në letrën e dërguar në Bordin e Fondit Monetar Ndërkombëtar.

Përfaqësues ndërkombëtarë në vend i kanë thënë gazetës se në qoftë se vendoset për rritjen e pagave, atëherë Kosova do të devijojë nga marrëveshja “Stand-By”.

“Qeveria fillimisht duhet të bëjë reformën e shërbimit civil. Rritja e pagave për 50 për qind do të thotë ndryshim shumë i madh në krahasim me politikat e Letrës së Qëllimit të nënshkruar nga Thaçi gjatë miratimit të marrëveshjes ‘Stand-By”, ka thënë një zyrtar ndërkombëtar nën kushtet e anonimitetit.

Sipas këtij zyrtari që njëherësh është njohës i marrëdhënieve të Kosovës me FMN-në, nëse Qeveria realizon premtimin për rritjen e pagave zyrtarisht po dëshmon se nuk do raporte të mira me FMN-në.

Në letrën e dërguar në korrik, Qeveria pati vlerësuar se do të ketë kujdes të shtuar në shpenzimet e pagave me tendencë të zvogëlimit të këtyre shpenzimeve përveç në raste kur hapen institucione të reja. Sipas letrës, në këtë kujdes përfshiheshin masat rregulluese për përmbajtje në shpenzimet aktuale për 5 vjetët e ardhshëm, sidomos në paga dhe mëditje në përputhje me rekomandimet e misionit të FMN-së.

“Planifikimi i kujdesshëm i iniciativave për shpenzime mbetet në qendër të përpjekjeve për të përmirësuar menaxhimin e financave publike”, thuhet në letrën e Qeverisë dërguar FMN-së.

Ndërkohë, nga Ministria e Financave të martën është thënë se në momentin kur Qeveria kërkon rritjen e pagave, do të shikohen modalitetet për të plotësuar kërkesat e saj. Muharrem Shahini, zëdhënës i Ministrisë së Financave, i ka thënë gazetës se planet e Qeverisë do të jenë prioritet i hartimit të buxhetit për vitin e ardhshëm, shkruan Koha Ditore.

“Ministria e Financave e bën hartimin e buxhetit të Kosovës duke u bazuar në prioritetet e Qeverisë”, ka thënë Shahini.

Sipas tij, sikurse shpenzimet ashtu edhe të hyrat përcaktohen në bazë të politikave qeveritare.

“Duke u bazuar në këto prioritete të Qeverisë, Ministria e Financave bën edhe planifikim për të hyrat dhe shpenzimet vjetore të buxhetit”, ka thënë Shahini.

Në bazë të parallogarive, po qe se në buxhetin e vitit të ardhshëm përfshihen edhe rritjet e premtuara të pagave për mësimdhënësit, atëherë në buxhet nuk do të vijnë mbi afro 50 milionë eurot e premtuar nga FMN-ja në formë të kredisë në dhjetorin e këtij viti. Po ashtu, Kosova nuk do të ketë mundësinë të përfitojë as rreth 20 milionë euro që planifikohen të vijnë nëpërmjet marrëveshjes “Stand-By” për vitin 2013.

Kosova ishte përjashtuar nga marrëveshja “Stand-By” në pranverën e vitit 2011. Qeveria e udhëhequr nga Hashim Thaçi nuk pati pranuar kushtet e Fondit Monetar Ndërkombëtar duke rritur njëanshëm pagat në sektorin publik. Si pasojë e kësaj, buxheti nuk pati fituar kredinë prej 108 milionë eurove që parashihej të realizohej gjatë vitit 2011 dhe fillimit të vitit 2012./Indeksonline/
 


Kendi i komenteve
Emri:
Komenti:

 
Sqarim:
Ndalohen fyerjet dhe përdorimi i gjuhës ofenduese. Indeksonline mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit Indeksonline.

Ju faleminderit për mirëkuptimin!

  • Të fundit
  • Më të lexuara
  • Më të komentuara
Portali Indeksonline u themelua nga një grup gazetarësh kosovarë në vitin 2010. Përball sfidave të gazetarisë bashkëkohore, të motivuar nga nevoja për lajme të shpejta dhe origjinale, në Kosovë, ndër shqiptarë dhe për shqiptarët - Indeksonline nuk ishte veçse një kërkesë e kohës.

Materialet dhe informacionet mund të kopjohen, të shtypen dhe të përdoren por vetëm pas referimit të qartë të burimit të Portalit Indeksonline, në përputhje me kushtet e përdorimit.

Të gjitha të drejtat janë të rezervuara.

© 2010-2014 Portali Indeksonline.