Ndodheni
Indeksonline / Indeks+
13:37 / E martë, 13 Nëntor 2012
0 Komente
Ja Pse Varësia Ndaj Seksit Njihet Si Çrregullim Mendor

 Varësia seksuale mund të cilësohet si çrregullim psikik. Deri më tani, psikiatrit kanë qenë në mëdyshje për ta konsideruar varësinë ndaj seksit si një çrregullim të sjelljes, për shkak të provave të pamjaftueshme shkencore.

 Por tashmë, një studim i ri, i kryer nga një grup shkencëtarësh të Universitetit të Kalifornisë në Los Anxhelos, ka testuar një sërë kriteresh për të diagnostikuar këtë sjellje.

 Rory Reid, studiues dhe docent i psikiatrisë në institutin “Semel Institute of Neuroscience and Human Behavior”, ka drejtuar një grup psikiatrish, psikologësh, terapistë çiftesh dhe asistentësh socialë për të vlerësuar kriteret e gjetura, duke i konsideruar si prova të dobishme për të arritur te një diagnozë e këtij problemi.

Varësi “pa arsye”

Hiperseksualiteti futet te varësitë e reja të ashtuquajtura “pa arsye”, siç është ajo e kumarit dhe e të bërit pazar pa hesap. “Kjo vartësi është një lloj ‘bulimie seksuale’ e pakontrolluar, megjithatë mekanizmi është identik me atë të pasionimit ndaj drogave ose alkoolit, sepse aktivizohen të njëjtat zona të trurit”, shpjegon një psikiatër.

 Gjatë viteve të fundit, fenomeni është përhapur shumë për shkak të internetit, ku postohen vazhdimisht video me përmbajtje seksuale. Më të rrezikuar nga ky fenomen janë të rinjtë.

Manuali i statistikave dhe diagnostikimit

Rezultatet e studimit të publikuar edhe në “Journal of Sexual Medicine” janë shumë të rëndësishme, prandaj specialistët po mendojnë seriozisht që t’i përfshijnë në edicionin e pestë të “Diagnostic and Statistical Manual of Mental Disorders” (DSM-5) e konsideruar “bibla” e psikiatrisë.

Me këtë studim mendohet të jetë krijuar edhe një bazë e vërtetë shkencore për sa i përket hiperseksualitetit si një çrregullim mendor.

 Si i tillë duhet diagnostikuar dhe trajtuar. Kriteret mbi të cilat janë bazuar studiuesit, do t’i ndihmojnë këta të fundit të kërkojnë dhe zhvillojnë strategji parandaluese për individët që rrezikojnë të vuajnë nga ky çrregullim.

Aktualisht në “DSM” janë përfshirë varësi si ajo ndaj nikotinës, drogave të ndryshme dhe alkoolit.

 Ashtu si të gjitha patologjitë e reja, edhe dhënia pas seksit po bëhet pjesë e varësive dhe çrregullimeve obsesivo-maniakale.

 Ky studim përbën tashmë një provë që tregon se bëhet fjalë për një çrregullim të vërtetë mendor, i cili herët a vonë do të përfshihet në “biblën” e psikiatrisë, ashtu si vartësitë e tjera të reja.

Simptomat

Kriteret e diagnostikuara (të zhvilluara nga një grup studiuesish të cilët po punonin për edicionin e ri të DSM-së) përfshijnë një sërë simptomash që lidhen jo vetëm me varësinë ndaj seksit, por edhe fantazitë e pafundme seksuale, etj.

 Gjithashtu, në qoftë se dikush është diagnostikuar si hiperseksual duhet të shihen me kujdes aktivitetet ose sjelljet e tij që lidhen me këtë çrregullim në prani të gjendjeve emocionale siç është depresioni.

 Përveç kësaj, mund të bëhet fjalë për persona që janë përpjekur të reduktojnë ose ndalojnë detyrimin seksual, por që s’ia kanë arritur qëllimit.

Varësia ndaj seksit dhe çrregullimet emocionale

Për të testuar kriteret e hiperseksualitetit, studiuesit ekzaminuan 207 pacientë me gjendje mendore të ndryshme, të cilët kërkonin ndihmë për të luftuar këtë çrregullim ose forma të tjera varësie.

 Në fund u vu re se 88% e pacientëve ishte prekur nga kjo patologji dhe se varësia seksuale lidhej me çrregullime emocionale, impulsivitetin dhe paaftësinë për të menaxhuar stresin.

Pasojat

Një fakt tjetër që doli nga studimi është se pacientët e dhënë pas seksit kanë pasoja të menjëhershme në krahasim me personat që vuajnë nga çrregullime të tjera psikike.

Nga 207 pacientët e ekzaminuar, 17% kishte humbur punën të paktën një herë, 39% ishte detyruar të mbyllte një lidhje, 28% ishte infektuar nga sëmundje seksualisht të transmetueshme dhe 78% kishte probleme referimi në jetën seksuale.

Në ç’moshë shfaqet ky çrregullim

Sipas studimit, 54% e pacientëve hiperseksualë e kanë kuptuar që vuajnë nga ky çrregullim para moshës 18-vjeçare, ndërsa për 30%, mosha e zbulimit varionte nga 19 deri në 25 vjeç.

 Sipas studiuesve, kjo e dhënë është mjaft interesante sepse nga njëra anë tregon se problemi lind herët, ndërsa nga ana tjetër jep mundësinë e marrjes së masave parandaluese.

Sjelljet tipike

Sjelljet më të zakonshme janë masturbimi, përdorimi i tepruar i pornografisë, seksi virtual, etj.

 Për këta pacientë, seksi bëhet një fiksim i vërtetë që kontrollon çdo aspekt të jetës së tyre dhe i bën të ndihen të pafuqishëm e të paaftë për të ndryshuar.

 

Pacientët e famshëm

David Duchovny, Tiger Woods, Michael Douglas, Mickey Rourke, Sharon Stone e Billy Bob Tornton janë disa nga personazhet e famshëm që e kanë pranuar me gojën e tyre varësinë ndaj seksit.

Disa prej tyre janë kuruar në klinika të specializuara, ku kanë kaluar periudha të gjata për t’u shëruar nga seksi.

 Në SHBA ekzistojnë edhe shoqata të ndryshme që u bëjnë thirrje njerëzve për ndihmë dhe mbështetje.

Megjithatë, ky çrregullim mund të kurohet në varësi të madhësisë së problemit.

 Mund të veprohet me terapi të ndryshme, duke i kombinuar me ato farmakologjike. Pacienti mund të trajtohet me stabilizues të humorit ose antidepresivë./Indeksonline/


Kendi i komenteve
Emri:
Komenti:

 
Sqarim:
Ndalohen fyerjet dhe përdorimi i gjuhës ofenduese. Indeksonline mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit Indeksonline.

Ju faleminderit për mirëkuptimin!
  • Të fundit
  • Më të lexuara
  • Më të komentuara
Portali Indeksonline u themelua nga një grup gazetarësh kosovarë në vitin 2010. Përball sfidave të gazetarisë bashkëkohore, të motivuar nga nevoja për lajme të shpejta dhe origjinale, në Kosovë, ndër shqiptarë dhe për shqiptarët - Indeksonline nuk ishte veçse një kërkesë e kohës.

Materialet dhe informacionet mund të kopjohen, të shtypen dhe të përdoren por vetëm pas referimit të qartë të burimit të Portalit Indeksonline, në përputhje me kushtet e përdorimit.

Të gjitha të drejtat janë të rezervuara.

© 2010-2014 Portali Indeksonline.