Ndodheni
Indeksonline / Lajme
20:51 / E mërkurë, 08 Gusht 2012
0 Komente
Shqipëria e rrezikuar nga zjarret, kërkohet ndihma e fqinjëve nga ajri

Shqipëria rrezikohet ekstremisht nga zjarret. Vatrat e zjarrit kanë përfshirë veriun e Shqipërisë dhe pjesën juglindore të vendit.

Drejtoria Operacionale e Drejtimit dhe Komandimit të Emergjencave Civile bën të ditur sot, në një njoftim për shtyp, një panoramë të situatës së vatrave të zjarreve në gjithë territorin e vendit, ku zonat më të rrezikuara janë Dibra, Kukësi, Puka, Tropoja, Librazhdi, Korça, Pogradeci, Vlora, Saranda, Tepelena dhe Gjirokastra.

Drejtoria e Emergjencave Civile thekson se "po vazhdohet të komunikohet me strukturat homologe në vendet fqinje për të siguruar mbështetjen e tyre me mjete nga ajri për të gjithë ato raste, kur vatrat e zjarrit nuk lejojnë ndërhyrjen nga toka".

Sipas kësaj drejtorie, vështirësi po paraqesin vatrat e zjarrit, të cilat jo vetëm nuk lejojnë ndërhyrjen nga toka, por edhe ku mundësia për ndërhyrje nga ajri është e pamundur, për shkak të lartësisë ku ato kanë shpërthyer, pasi edhe mjetet fluturuese nuk arrijnë të veprojnë, transmeton BW.

Në qarkun e Beratit, Tiranës dhe Fierit nuk është shënuar asnjë rast zjarri. Në qarkun e Dibrës zjarri ka rënë në fshatin Terzë të komunës Kala e Dodës. Për shuarjen e këtij zjarri, që vazhdon i favorizuar nga terreni i thepisur dhe era, po punohet me vështirësi. Zjarri i rënë në fshatin Qafë Murrë, të Dibrës, ka dëmtuar një sipërfaqe prej 5 ha, është nën kontroll, ndërkohë që po punohet për shuarjen e plotë të tij.

Në qarkun e Elbasanit flakët e zjarrit kanë përfshirë malin e Sopotit, në komunën Stravaj. Strukturat e shërbimit pyjor dhe komuniteti janë angazhuar për shuarjen e tij, por terreni tepër i thepisur e vështirëson punën. Ndërsa janë nën kontroll zjarret e rëna në fshatin Grabovë e Sipërme, komuna Lenie, në fshatin Tushan, komuna Sult, në rrethin e Gramshit.

Në qarkun e Gjirokastrës ka një vatër zjarri në pjesën e sipërme të malit të Gjirokastrës, ku po punohet për shuarjen e tij. Ndërsa zjarri i rënë në masivin me pisha të reja në faqen e kodrës pranë qytetit është shuar.

Në qarkun e Kukësit vatrat e zjarrit kanë përfshirë zonën pyjore Leproj dhe Keçel, të komunës Malzi; Gjegjan, komuna Tërthore dhe Qafë Komi 1, komuna Arrën; në Letaj, të komunës Golaj, rrethi Has. Të gjitha vatrat e zjarrit janë nën kontroll dhe vazhdon puna për izolimin e tyre të plotë. Ndërsa në Malin e Gjallicës vatrat e zjarrit për shkak të terrenit tepër të thepisur mbeten problematike. Po punohet me ngulm për vënien nën kontroll. Vatra të tjera zjarri më pak problematike mbeten ato në zonën e Qafë Komi 2, komuna Arrën; Shoshan-Begaj, komuna Tropojë e Vjetër. Po punohet për izolimin e plotë dhe shuarjen e tyre.

Në qarkun e Korçës vazhdojnë vatrat e zjarrit në pyllin me pisha në kufirin ndarës ndërmjet rrethit të Korçës dhe Kolonjës, rreth 5 km në vijë ajrore nga kufiri me Greqinë. Për fikjen e zjarrit janë angazhuar forcat pyjore dhe komuniteti nga fshatrat Kozel, Pepellash dhe Floq, të komunës Mollaj, rrethi Korçë, si edhe nga komuniteti i komunës Mollas, rrethi Kolonjë. Janë djegur afërsisht 62 ha pyll, por situata ka përmirësime të ndjeshme.

Në qarkun e Lezhës flakët e zjarrit në fshatin Shëngjin të komunës Fan, rrethi Mirditë, kanë djegur një sipërfaqe pyjore. Zjarri është nën kontroll, ndërsa forcat zjarrfikëse dhe pyjore, si edhe komuniteti po punojnë për shuarjen e tij.

Në qarkun e Shkodrës në rrethin e Pukës, në Pjavër, komuna Iballë, zjarri është riaktivizuar, por është nën kontroll. Zjarri në Grykë të Kabashit, ndërmjet komunës Qelëz dhe Rrape, është nën kontroll dhe po punohet. Zjarri në malin e Tërbunit është jashtë kontrollit, pasi nuk mund të ndërhyhet se është shumë lart dhe nuk shkohet. Zjarri në Malin e Veleçikut, komuna Kastrat, e rrethit të Malësisë së Madhe, është shuar.
Në qarkun e Vlorës zjarri në kurorën me pisha në qytetin e Delvinës po shkon drejt shuarjes me ndërhyrjen e forcave zjarrfikëse, forcave pyjore dhe komunitetit.

Ministria e Mjedisit i është drejtuar Malit të Zi dhe Greqisë për ndihmë nga ajri për zjarret më problematike, por edhe në këto vende situata është e vështirë.
“Ne ndihmë nga vendet fqinje kemi kërkuar për mbështetje nga ajri, pasi vendi ynë nuk ka mjetet për ndërhyrje nga ajri. Kjo është bërë për shkak të terrenit të vështirë dhe për shkak të kushteve atmosferike të vështira.”- u shpreh specialisti në Ministrinë e Mjedisit, Genci Hoxhaj.

Ekspertët e Ministrisë së Mjedisit iu bëjnë apel qytetarëve që të tregojnë kujdes në përdorimin e zjarrit. Pasi rezulton se shkaqet kryesore të zjarreve janë zjarrvënie e qëllimshme dhe pakujdesia./Indeksonline/
 


Kendi i komenteve
Emri:
Komenti:

 
Sqarim:
Ndalohen fyerjet dhe përdorimi i gjuhës ofenduese. Indeksonline mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit Indeksonline.

Ju faleminderit për mirëkuptimin!
  • Të fundit
  • Më të lexuara
  • Më të komentuara
Portali Indeksonline u themelua nga një grup gazetarësh kosovarë në vitin 2010. Përball sfidave të gazetarisë bashkëkohore, të motivuar nga nevoja për lajme të shpejta dhe origjinale, në Kosovë, ndër shqiptarë dhe për shqiptarët - Indeksonline nuk ishte veçse një kërkesë e kohës.

Materialet dhe informacionet mund të kopjohen, të shtypen dhe të përdoren por vetëm pas referimit të qartë të burimit të Portalit Indeksonline, në përputhje me kushtet e përdorimit.

Të gjitha të drejtat janë të rezervuara.

© 2010-2014 Portali Indeksonline.